حضرت عبداللہ بن ام حرام رضی اللہ تعالیٰ عنہ‘ سے روایت ہے کہ میں نے رسول اللہ صلی اللہ علیہ وسلم کو ارشاد فرماتے ہوئے سنا کہ بس سناء اور زیرہ کو استعمال کرو اس لئے کہ ان دونوں میں بجز سام کے ہر بیماری کے لئے شفا ء ہے. عرض کیا گیا کہ حضور سام کیا ہے؟ آپ صلی اللہ علیہ و سلم نے فرمایا موت۔
(سنن ابن ماجہ ۔طب نبوی از حافظ ابن القیم ۔ص108)
سنا ء کے فائدے:
سناء کو عربی اور فارسی میں سناء مکی اور انگریزی میں senna کہتے ہیں۔ یہ ہر خلط کی مسہل ہے۔ دماغ کا تنقیہ کرتی ہے. کمر درد، عرق النساء، جوڑوں کے درد اور نوبتی بخاروں میں فائدہ دیتی ہے. پیٹ کے کیڑوں کی قاتل ہے.
(کتاب المفردات۔ ص 292)
بیماریوں کی ماں قبض:
اگر اجابت بوقت معمولہ نہ آئے. یعنی کبھی دوسرے تیسرے روز آیا کرے۔ یا اوقات میں تبدیلی نہ ہو لیکن مقدار میں کم آئے گویا اجابت با فراغت نہ ہو تو ان دونوں صورتوں کو قبض ہی کہا جائے گا۔ آج کل بے شمار لوگ اس مرض میں مبتلا ہیں مگر بے پروائی کرتے ہیں. اسی وجہ سے انہیں طرح طرح کی بیماریاں چمٹی رہتی ہیں۔ کیونکہ قبض بقول اطباء فی الواقع ام الامراض یعنی بیماریوں کی ماں ہے۔ اس کی وجہ سے درد سر، نزلہ، زکام، نظر کی کمزوری، دل کی گھبراہٹ، بے چینی، بھوک کی کمی، بواسیر وغیرہ امراض پیدا ہوتے ہیں. اس لئے ہمیں لازم ہے کہ اس مرض کو معمولی نہ خیال کرتے ہوئے اس کا علاج کریں.
چائے کا زیادہ استعمال، سگڑیٹ یا حقہ نوشی، افیون کھانا، دماغی محنت کی زیادتی ،گھی دودھ کا استعمال نہ کرنے کی وجہ سے آنتیں خشک ہوکر قبض کا باعث بنتی ہیں.
رفع حاجت کے وقت زیادہ دیر لگتی ہے اور پھر بمشکل خشک سا پاخانہ خارج ہوتا ہے اوربعض مواقع پر اجابت خون آلود ہوتی ہے. یہ سب قبض کی علامات ہیں.
(کنزالمجربات. ج ۱۔ ص 125)
سناء کی سب سے بڑی خوبی یہ ہے کہ باوجود مسہل ہونے کے مقوی قلب ہے. وسواس سوداوی خصوصیت سے زائل کرتی ہے. عضلات کو چست بنادیتی ہے. بالوں کو گرنے سے بچاتی ہے. جوں سے حفاظت کرتی ہے ۔پرانے درد سر کو ختم کرتی ہے. خارش، دانے اور مرگی کے لئے نافع ہے. (بب نبوی ا. ص 109)
خمیرہ ملین برائے قبض کشائی:
گل سرخ ایک پاؤ، سناء مکی ایک پاؤ، ایک سیر پانی میں رات بھر بھگو رکھیں. صبح کو آگ پر یہاں تک جو ش دیں کہ ڈیڑھ پاؤ پانی رہ جائے تو اتارلیں اور چھان کر پانی میں ڈیڑھ سیر مصری شامل کرکے خمیرہ تیار کرلیں اور محفوظ رکھیں۔ ایک تولہ سے دو تولہ تک قبض کے لئے کھلائیں ۔
(کنزالمجربات۔ ج ۳۔ ص 657)
معجون سناء برائے دائمی قبض اور درد قولنج:
سفوف سناء مکی، مویز منقیٰ اور روغن بادام سب چھ چھ ماشہ، گل قند چھ تولہ، مغز بادام ایک تولہ سفوف سناء کو روغن بادام میں چرب کریں اور مغز بادام اور مویز منقیٰ شامل کرکے گل قند ملادیں. چھ ماشہ گرم دودھ سے رات کو کھائیں.
